老玫的部落格

        三十幾年前， 彼個年代，查某囝仔若讀到高中畢業就算袂﹝禾黑bai2﹞

矣， 會記哩高職拄畢業，表兄介紹阮去台北食頭路，

來到一間五金零件行作店員，內底的零件攏足細項，彼時陣監視器無遐時行

可能驚人偷提，頭家交代阮若有人客入來，就愛佮綴咧，

等伊撿好伊欲要的物件，才共伊提去結數。

       第一工上班，阮嘛誠認真佇做工課，有人客入來，阮就共伊綴牢牢。

下晡，有一個人客入來，阮嘛足骨力，隨共伊綴咧，想袂到伊煞佮阮歹講：

「你甭像摸壁鬼共款，綴牢牢，你是驚我偷提是否？」予我感覺足委屈耶，

目屎煞流落來。

       莊腳囡仔來到繁華的台北，人地生疏，加上毋捌離開厝遐遠，

心情嘛無蓋好。作一工白工，我就“腳底抹油”----  溜。

第二工就坐火車返來厝，和阮阿爸参詳阮欲擱讀冊。

        雖然過這久，我猶是印象真深。即馬我若去踅街，有店員綴牢牢，

阮嘛感覺真無爽快。毋過，我知影這是伊的職責所在，我會共伊講，

我慢慢仔看，若有需要你服務我才叫你。

若看無甲意的物件，欲行出彼間店，我嘛會共伊說“多謝”。