今仔日是冬節,冬節要食圓仔,代表團圓,冬節圓食落去就加一歳囉。
會記哩細漢的時佇庄腳,冬節前一工,阿母就會佮糯米浸水一段時間了後,提去予人挨作米漿裝佇粿袋仔,轉來了後佮粿袋仔綁佇椅條予焦水,第二工冬節透早才搓圓仔,lann搓lann煮,圓仔會一粒一粒浮起來,阿母講:一粒浮一粒囫。阮遮的囡仔攏嘛一人食一碗,才出門去讀冊,心內感覺足溫暖。
昨昏,阮小嬸嘛提一包家己搓的圓仔予我,透早我就佮煮一鍋,家己搓的圓仔較khiu7。
冬至即工,日頭直照南回歸線,所以咱遮暝上長,日時上短;明仔載起,日時會慢慢仔變長,暗時就慢慢變短,陽氣慢慢仔回升,所以說“冬至一陽升”。
每年冬節攏佇新曆12月22日前後,舊曆就無一定。
諺語講:「冬至在月頭,欲寒佇年兜;冬至月中央,無雪也無霜;冬至在月尾,烏寒正二月。」意思講,冬節即工若佇舊曆的上旬,那按呢年底就會誠寒;若佇中旬,過年的時天氣會真好;若佇下旬,過年後正月、二月會足寒。今年冬節佇月中央,那按呢過年好天,即馬會當好好計畫過年欲去佗位thit迌矣。
劉老師贈詩回應分享
規家食紅圓
囡仔好搖飼
大人大賺錢
老人食百二
流落異鄉贈詩回應分享
規家食紅圓 做夥笑瞇瞇
又擱過一年 大小無代誌
白兔好頭彩 明年無災害
臺灣好所在 惕迌是應該
全站熱搜