老玫的部落格

頂個月月底，欲注預防射進前，倒爿耳仔發炎，我想講先治療好了後，才去注預防射，

衛生所敲電話來催，雖然耳仔袂疼猶塞塞，衛生所醫生講無要緊，會使注矣，

我就予伊注落去。注了後是無啥麼艱苦，只是小可懶懶，過兩工就好了，

毋過耳仔猶是塞塞。講起來我是真蠻皮，自按呢勿愛插伊。

可能好猶未離，加上這幾天睏眠無夠，煞擱反動，耳仔疼，鬢邊siak-siak叫，

連帶齒岸浮，頭暈目暗，嘛西嘛西。雖然無泰山的體格，毋過規個人若阿婆仔的身體 ，虛咧咧。

倒爿耳仔比頂擺擱較無聽著，我佮囡仔講：「恁若欲講秘密，上好佇我倒爿講，我耳孔禮拜。」

囡仔講：「若欲愛錢，愛佇正爿講，才袂予阿母準拄好去。」這、、、這、、敢擱有天理。

這屆毋敢蠻皮，趕緊拆兩帖中藥，用啞巴媳婦煎煎灌灌落去，已經好真劑啊。

頂面烏嚕嚕親像烏咖啡彼碗就是，第二碗是啉完碗底黃gim3-gim3

一看就知影苦觸觸，藥帖內底有囥黃連、黃芩、梔子、金銀花、、、等等

擱加一寡清熱解毒，消炎降火的藥仔，實在有夠苦，人講“良藥苦口”應該就是按呢

所以若有身體無爽快的時陣，一定要趕緊揣醫生，毋通拖拖沙沙，才袂愈醫愈大支