老玫的部落格

早起聽到電話 聲，我電話舉起來，聽著阿母的聲音，

我叫是阿母心情又擱鬱卒啊

 阿母講：無代誌，心情歡喜欲佮你講話啦！

我共伊講：聽你安爾講，我嘛足歡喜。

阿母講伊拄才敲去高雄三兄彼，三兄嘛講真歡喜

阿母擱會共我滾耍笑，講我是毋是歡喜佮早頓毋免食

我共阿母講，我會歡喜佮加食一份，而且規工心情會足歡喜



阿母敲電話來，在別人來講，是一件平常的代誌，是安怎我會足歡喜

因為阿母今仔日的口氣真歡喜，和平常鬱卒的時無共款。



阿爸和阿母 ，蹛佇莊腳，身體猶算袂 bai2﹝禾黑﹞，

阮即幾個囡仔成家了後，隨人出外拍拼事業

莊腳就賰兩老兮，歇睏日逐家攏會轉去看in兩老的，

聽阿爸佮阿母互相吐糗，日子過得平安順序。

七年前，阿爸車禍意外過身以後，阿母雄雄失去倚靠

漸漸失去記智，見講講過去，隨講隨袂記。

阮袂放心放阿母一個人蹛，阿兄 tshua7 阿母去高雄，

阿母都市蹛袂慣勢，逐工吵欲轉去莊腳 。我 tshua7 阿母來蹛阮兜，

阿母講蹛查某囝 in兜會予人笑，嘛是蹛無兩工就吵欲轉去。



阿母就是離袂開伊蹛五、六十年的所在, 後來阮決定勿愛擱勉強伊。

毋過阮逐家攏有工課、頭路，無人會當轉去莊腳陪阿母。

只好請外勞來照顧阿母，二姐蹛附近，逐工轉去尋頭看尾

阿母驚阮共伊放予外勞就勿愛揷伊，拄開始真討厭外勞，

講攏是伊﹝外勞﹞害的，阮遮兮囡仔才會毋轉去陪伊。

逐擺阮偌轉去看阿母，阿母足歡喜，阮哪欲轉來的時，

阿母就憂頭結面、唉唉雜雜，講伊足歹命， 阮聽著心肝足艱苦

阿母，阮知影您無伴，希望有序細佇身軀邊，毋過確實是心有餘力不足啊

逐擺敲電話轉去請安，您的心情哪袂 bai2﹝禾黑﹞，我就較放心

哪拄著您心情無好，講“欲死也袂死”，我規工著真鬱卒呢

阿母誠久無敲電話來矣，我叫是伊腦筋退化未記哩按怎敲

阿母講是叫  jenny 敲的 ，擱講等一下欲敲去和小妹開講

聽阿母講話的口氣，真正足歡喜，我的心情嘛綴咧輕鬆起來

阿母，我希望您逐工攏有快樂的心情，毋管是您敲電話予我，抑是

我敲電話轉去，攏會當聽到您歡喜的聲音。

即馬，阿母真依賴 jenny， jenny 嘛真有耐心，真正足感謝伊