老玫的部落格

下早起，朋友敲電話予我，講伊的大漢查某囝往生矣，我tshuah一趒，20外歲的查某囡仔，哪會雄雄過身？彼個查某囡仔，生作高強大漢，看著人笑頭笑面，來阮兜阿姨長、阿姨短，擱會佮我掠龍，予我想著足毋甘。

伊因為生作大箍，對家己無自信，無啥麼朋友，若有人對伊較好，伊就佮人當作死忠兼活帖，足刁直，父母的苦勸攏聽不入耳，嘛因為按呢，絞入一件毒品案，伊的朋友吸毒死亡，伊煞予人告對法院去。最後雖然判無罪，但是這件代誌，予伊打擊真大，定定睏袂去。我彼個朋友，開袂少錢請律師走踨，行法院，氣罔氣，家己的查某囝，無tshap伊嘛袂使哩。兩父仔囝個性攏真硬，定定犀牛仔照角，後來查某囡仔搬出去外口蹛，毋知是毋是愛睏藥仔食傷重，才造成不幸的悲劇。

中晝利用歇睏的時間，佮阮翁去朋友in兜關心一下，in某啼啼哭哭佮我講經過；阮朋友看起來真堅強佇發落後事，毋擱心肝內一定足毋甘、心疼、懊惱。

今仔日規工心情無好，這件代誌予我感覺咱要好好珍惜身軀邊的人，互相關心，毋通等悲劇發生才來後悔，咱定定講欲知按怎欲知按怎，預知就傷慢矣。