凡那比風颱來矣，新聞報講今仔日規工風雨攏會足大，早起風雨一陣一陣，到下晡就無啥雨矣，風嘛較小矣。阮朋友佇in郵局的康樂室，有預定卡拉Ok，電話一直敲，招欲去唱歌。我想講三個查某囡攏佇厝，無愛出門，in隨人佇讀冊、上網路，無閒tshap我，顛倒叫我和阿媽tshua7去唱歌。
真久無唱歌矣，無嘛好。我騎oo-too-bai2載阮大家﹝婆婆﹞過去，到位無若久，查某囡敲電話來問看到位袂？平常時顛顛﹝thian-thian]，閣會敲電話來關心阮的安全，想著嘛足感心矣。
去到塊，阮朋友和伊的朋友已經點一堆的歌嘛唱一睏矣。有的歌捌聽過袂曉唱，有的歌會曉唱，袂記得歌名，有人點著才知影，哦！原來是這條歌；較捷佇唱的人會唱新歌，咱就加減佮學起來，唱來唱去猶是台語歌比較有意思。唱歌實在是真好的活動，會當減輕壓力，毋管捌抑毋捌，唱好唱﹝禾黑﹞無掠包， 大家歡喜就好。喙焦閣有楊桃會當潤喉哦。
全站熱搜
留言列表
