老玫的部落格

        家己種一叢，較贏看別人，這句話的意思是講，咱逐項代誌要靠自己打拼，努力，增加家己的實力，也就是華語講的要有 「兩把刷子」，毋通想欲靠別人，向望別人來佮你鬥相共，人講：靠山山會崩，靠人人會倒，靠家己上好。家己若有二步七丫，自然人就會予你機會，機會若來，只要腳踏實地，一步一腳印，將來一定有好的前途佮未來。

        有一個美國加州大學畢業的藝術博士-----黃美廉，佇出世的時陣，因為意外造成腦性麻痺，去傷到運動神經和講話的神經，所以六歲以前規身軀軟膏膏，未曉倚，未曉講話，未曉舉筆，娶出去人攏佮伊指指拄拄，in阿爸阿母並無放棄伊，顛倒擱較用心來照顧伊，教伊讀書、寫字，後來發現伊有繪圖的天份，伊就認真繪圖，立志欲做一個畫家。伊雖然動作比人較慢，要用較濟的時間去準備功課，嘛無時間去thit-tho5，但是嘛因為按呢，伊擱較認真打拼，靠著意志佮毅力，完成伊的理想，得到藝術博士的學位。

        俗語講：做雞就筅，做人就反。像黃美廉博士這款身軀有缺陷的人，都知影要打拼，何況咱好手好腳的人。搰力食粟，貧憚吞瀾，有一寡人腳健手健，食好做輕可，抑無就欲食毋討趁，規工弄溜漣，落袋仔袋磅子的時，就來偷來搶，到尾啊就要去食免錢飯。In毋知影有寒就有熱，有艱苦才有快活，做人上重要的要有志氣，知影靠家己的雙手打拼的人，才會成功。若無少年未曉想，食老就毋成樣。

        阮兜有三姊妹仔，阿母佮阮講：恁三個囡仔，機會攏共款，將來生活好歹，靠恁家己打拼，毋通後擺才來窮分，講我較疼伊無疼你。有一條歌講：三分天注定，七分靠打拼，愛拼才會贏。阮兩個阿姐攏足認真讀冊，我無較打拼咧，後擺要靠in飼，著真漏氣啊。所以講：家己種一叢，較贏看別人。實在足有道理。我的演講到這結束。