老玫的部落格

        我感覺上歡喜的代誌就是圍爐。是按怎講咧？阮兜樓腳佇做生意，灶腳佇三樓，平常時阿媽佮飯煮好了後，阿爸、阿母、阿叔、阿嬸，因就輪流去樓頂食飯，因為店口要有人顧，所以就無法度坐同桌食飯；阮這些的囡仔，嘛是共款，放學了後，先轉來的先食，食飽要補習的去補習，阿姐讀大學去住學寮，嘛是罕哩同齊食飯，只有圍爐這工，才有機會規傢伙仔做伙食飯。

       圍爐這下晡，阿母佮阿嬸，佇灶腳傳好料，阿爸佇包紅包，阮這些囡仔，會共袂腳手濟，有的排椅桌，有的攢碗箸，有的和阿叔貼春聯，鬧熱滾滾，歡歡喜喜準備過年。我去灶腳看阿母和阿嬸煮好未，順續看要鬥腳手嗎？我看著阿嬸佇切腌腸，芳貢貢、貢貢芳，我差一點仔嘴瀾就流落來，阿嬸卡緊提一塊塞對我的嘴裡。哦！足好食耶。我佮煮好的菜，一盤一盤捧去囥桌頂。

        圍爐的時陣，看著規桌頂的好料，害我大腸告小腸嘰咕叫。桌頂有腌腸、燒肝、蝦仔、雞肉、魚仔，人講食魚食肉，嘛要有菜佮，當然嘛有幾盤仔青菜，荷蘭豆炒蝦仁、芹菜炒花枝、長年菜、飛薐仔，擱有一鍋菜頭湯，食菜頭好彩頭，足膨派。逐家圍圍一桌，阿媽、阿爸、阿母、阿叔、阿嬸、佮阮這些囡仔，一桌圓圓，逐家若食生臊，有講有笑，足歡喜。

       阿爸欲分紅包的時陣講，逐家要講一句好話，才會當提紅包。有的講新年快樂，有的講恭喜發財，有的講大吉大利，輪著上細漢的小弟，嬰嬰嘤嘤講未出來，阮阿母佇伊的耳空邊教伊講一句話，伊一箍槌槌，足大聲講：「阿姆足媠。」予阮逐家笑佮落下骸兼倒向向，嘛害我差一點反腹。

        食飽了後，大人收桌頂、洗碗箸、泡茶、切果子，阮這些囡仔，圍做伙開始戲牌仔，看特別節目，逐家攏足歡喜，我上佮意這款團圓的氣氛，我感覺我足幸福、足快樂。