無德就無恥，心有道德，才是學問
俗語講：樹仔“細叢若毋彫，大叢就雕未曲﹝khiau﹞”人嘛是共款，“細漢若無熨，大漢就熨未屈”。所以一個人的道德，品行，廉恥，攏是自細漢就要好好培養佮牽教。毋管是家庭抑是學校，攏教咱要知影仁義道德、禮義廉恥，有好的人格和品行，自然會遵守道德、知影廉恥，將來毋管是讀書，抑是吃頭路，坐予正，自然就會得人疼。
即馬有一寡人，勤食儉做，骨力嘤嘤，規工弄溜輦，欲吃毋討趁，看到電視信用卡廣告講：「喬治瑪莉」，叫是真正借錢免還，目睭皮無漿泔﹝am2﹞，信用卡辦幾落張，拼命lu3、亂散開，等到銀行欲來討數的時，走頭無路，才來無錢怪政府，命歹怪父母，欲哭欲﹝目聶 ni4﹞，唉爸叫母。無彼個尻川，擱敢食彼個瀉藥，歸尾嘛是留予序大人替伊拭尻川；若無就用騙的、用偷的、用搶的、甚至綁票恐嚇，啥麼代誌都敢作，真正是無啥世，根本就毋知影道德廉恥欲按怎寫，莫怪講無德就無恥。
這幾年來，一寡無德擱無恥的政治人物，為著家己的利益，煩惱無齣頭未出名，規工佇電視頂烏白爆孔，一支喙吱吱彈，有影嘛講，無影嘛講，講佮喙角全波。甚至因為意見無仝，就起腳動手，冤家勞債，佮人扑佮流血流滴，教歹囡仔大細。加上一寡無道德的媒體，夯柴添火著，講一個影就生一個囝，爆毋對抑無更正，未曉會失禮，佮規個台灣舞佮亂糟糟，經濟、治安愈來愈﹝禾黑bai2﹞，外國人毋敢來投資，失業率愈來愈懸﹝kuan5﹞，詐騙集團嘛愈猖狂，人和人之間互相失去信任，日子過著足齷齪。我佇這欲拜託這的政治人物和媒體“勿愛擱亂矣”。
講到這，予人聽著足鬱卒，干若規台灣攏是歹人，和一寡食飽換枵﹝iau﹞逐工佇遐吵家撈瑕的政客爾爾。其實免煩惱啦！有愛心、有道德的的人猶是足濟，像嘉義有一個號做“嘉邑”的行善團，有錢出錢，有力出力，四界去舖橋造路，所做的工程比政府的品質擱較好。擱有，台灣的慈濟，集合逐家的力量，無論是國內抑國外，只要有需要幫助的所在，攏會看著in的形影；猶擱有各行各業的志工朋友，攏惦惦佇為這個社會付出愛心，做善事。雖然in的學歷可能無遐的政治人物和媒體懸﹝kuan5﹞，但是in的道德、愛心，才是值得咱逐家來學習。所以講有道德才是學問。
俗語講得好：千算萬算，毋值得天一畫。遐的自私自利、為非糝作，無照天理的人，天自然會佮處罰。人講：有才情，嘛要有好品行。心中有道德，知影廉恥，按呢毋才是一個有學問的人。
道德是人心中的一支尺，是咱做人做事的原則，只要咱遵守這個道德，安分守己，一步一腳印，共同為社會來打拼，若按呢，社會自然會和諧，生活就會快樂，國家才會安定進步。
我的演講到這結束，多謝各位。
留言列表
