我欲參加台語演講比賽，拜託阿母替我寫演講稿，阿母問我啥麼題目？我佮講“講未出嘴的艱苦”，阿母隨應講：「你無煩無腦，食佮若阿不倒，哪有啥麼講未出口的艱苦。」想想咧，嘛有影呢，自細漢到今〈dann〉食好做輕可，除了有當時仔和阿姐“犀牛仔照角”以外，真正想未出有啥麼艱苦的代誌。
講到這，我想到阮外媽。外媽已經八十九歲，蹛佇南投山頂，以早和外公兩個人有伴，囝兒序細攏去都市食頭路、做生意，干焦放假的時陣，有閒的人才會當轉去看in兩個老大人。自從阿公過身了後，只賰阿媽一個人無伴，記憶變足﹝禾黑﹞，講著話“見講講過去，隨講隨袂記”，需要人佇伊的身軀邊照顧，毋擱伊體諒序細佇外面賺錢不簡單，毋敢傷麻煩人，定定講無要緊啦，恁免煩惱。其實伊足要人佮伊做伴，我想這就是阿媽講不出嘴的艱苦。
最近看著二姐面憂面結，無啥欲講話，我想講是毋是功課濟壓力大？抑是和同學冤家佇無歡喜？我毋敢問伊，驚去掃著風颱尾。後來我才知影，原來伊佮意著一個查圃囝仔，毋擱伊的好朋友嘛對彼個查圃囝仔有意思，予伊愛佇心內，煞毋敢講出來，真正是啞口壓死囝，這就是二姐講未出嘴的艱苦。
這一、二年來經濟無好，有的人無頭路，有的人佇放無薪假，逐家手頭攏較an5，所以各行各業的生意攏受著影響，阮兜的生意嘛差真濟。阮兜和阿叔in規家口仔，攏總十外個人，攏靠這間店佇食穿，趁錢龜爬壁，開錢山崩崎，阿爸是一家之主，看到時機這呢歹，生意收入變較少，雖然伊規工猶是嘴笑目笑塊招呼人客，我想阿爸心肝內應該是真煩惱，這嘛是阿爸講未出嘴的艱苦。
讀國中的時，阮有三、四個感情足好的同學，佇學校規工褲帶結相倚，歇睏日，阮相招去圖書館讀冊；其中有一個，in阿爸阿母佇做路邊攤生意，歇睏日生意較好，伊要佇厝照顧小弟小妹，無法度和阮去圖書館，伊足欣羨阮，毋擱閣毋敢佮in阿爸阿母講，我想伊的心情一定足艱苦。
佮恁講一個秘密，其實我嘛有講未出嘴的艱苦，就是我足gau5食，阮阿母講我一支嘴敢若掛牛嘴籠，無論正頓、點心、抑是水果，一下仔就予我食佮清氣溜溜，阿姐食袂完的物件，阿母講無要緊，等一下叫妹仔食，未輸佮我當做潘桶咧，所以我足煩惱我真正會變成阿不倒。
佇咧世間，咱若有艱苦，能講出來，這還算是小可代誌。但是有的人是體諒朋友；有的人是體諒序大人的艱苦；有的人是體諒序細的立場，攏有伊講未出嘴的艱苦。總講一句，活佇世間，永永攏會拄到無都好的時陣，永永攏有一寡煩惱，但是這種艱苦，咱佮伊當做是一種鼓勵，當作是一種力量，無的確度過這個難關，咱就對人生多學著一項。俗語講得好：食一歲，要學一歲。等到有一天，咱佮遮的艱苦，當作是佇食補，那按呢遮的講未出嘴的艱苦，嘛是咱性命中一種生長的力量。恁逐家講是不是咧？
俗語講：一人業一項，無人業相共。每一個人攏有無共款的艱苦佮煩惱，無可能萬項代誌攏順心如意，嘛有講未出嘴的時陣。但是拄著代誌要勇敢面對，想辦法解決。人講：歡喜一工，無歡喜嘛是一工，所以我希望逐家心情放輕鬆，快樂過日子。
我的演講到這結束，多謝各位。
留言列表
