老玫的部落格

   俗語講得好：花無百日紅，人嘛無千日好。這句話一點仔都無毋對，無論啥麼花，花開花謝，真少超過三個月；人嘛是共款，總會遇到無順利的時，這陣生活過了順序，未當保證一世人攏順序，有當時會因為環境、經濟、天災地變，將你一世人的拍拼，一聲就變烏有去。有人跋一倒煞爬未起來，但是嘛有人毋認輸，打斷手骨顛倒勇，這句話就是咱俗語說的 ” 跋一倒撿著一隻金雞母 ”。

　　阮二姐考大學的時，足認真，讀佮無暝無日，可能是壓力傷大，第一擺考無好，連伊想欲讀的機械系都考未得，伊就像雞胿仔消風共款，規工憂頭結面，阿母講：「人生親像大舞台，甘酸苦澀排歸排，這祇是你一個小可的挫敗，還有機會，輸人毋輸陣，輸陣歹看面，這陣開始，心情放輕鬆，生活正常，睏眠要有夠，照進度去準備，一定會進步。」五個月後，七月初一擱第二擺考試，分數進步足濟，一下仔衝到電機系，這馬己經三年矣，讀佮真歡喜。當初的鬱卒、懊惱已經走佮無影無跡。真正是跋一倒，撿著金雞母。

    我捌看過一條新聞，新聞是佇講林志浩先生的故事。林志浩先生， 28歲的時就和朋友創業，去非洲賣汽車零件，上好的時陣一個月領 200萬的薪水，後來因為經濟變化相緊，無趁錢，只好佮公司收起來轉來台灣；伊的經驗豐富，真緊就揣著頭路，而且做到經理。但是二年前有一天，伊的頭家雄雄要伊轉去厝反省反省，自按呢伊就無頭路，林先生無代無誌去予人辭頭路，khih-moo-tsih真bai2，毋願頭家的一句話就來失志，嘛為著猶佇讀國小、國中的囡仔，伊決定欲揣一個有保障的頭路，自彼時陣開始，伊佮食苦當作食補，認真準備公務人員的考試。

    俗語講：人無” 激 ”毋拼，水無” 激 ”毋流。林先生想講伊已經四十幾歲，無拼未使哩，人少年人是用「時間」佇準備考試，伊要用「生命」來準備考試，伊去買真濟冊，認真讀，二年半就考牢公務人員，現在伊佇台中監理站佇食頭路。林先生講：即馬一個月領3萬5，和以早未比tih，毋擱趁較少食較舀﹝io2﹞，生活過著真安定，家庭擱顧會著，嘛因為生活正常，毋免交際應酬，身體顛倒較健康。恁大家講這是毋是跋一倒撿﹝khioh﹞著金雞母尚好的例咧。

    有一寡人，事業失敗跋一倒了後，就失去鬥志，歸工怨天怨地， 怪東怪西，干若知影弄溜連，毋知影欲認真打拼，啥麼年歲濟啦、記憶bai2啦，無時間啦，理由一大堆，若按呢就算金雞母落佇伊的面前，伊嘛f撿未著。人活佇世間，永永攏會遇到困難，困難有當時是一種考驗，只有面對現實才有東山再起的機會。林先生的故事，就是佇佮咱講：甘願做牛，就毋驚無犁通拖，只要認真打拼，總有擱爬起來的一工。

　　所以我希望在座的各位，咱面對咱人生的挫敗，要有志氣，嘛要有勇氣，拄到困難，要想辦法來解決，絕對不是閃避伊就會無去，所以咱要提出勇氣大步 向前走，將擋佇咱面前的困難踢開，創造美好的未來。

我今仔日的演講到這結束，多謝各位。