逐擺考試煞，若考無好，我著會講：「欲知考試前就較認真咧，即馬嘛袂考這bai2。阿母講：「欲知欲知早就好額矣。」
人生短短幾十年，咱未使定定代誌做無好勢，過了後才來講：欲知按怎、欲知按怎。咱要好好把握時機，若無後悔就未赴矣。
有啥麼代誌要把握時機咧？第一：有孝未使等。阮外媽蹛南投，已經八十九歲，腦筋已經退化，記智足ｂai，見講講過去，隨講隨袂記哩。路頭遐遠，阮阿母二、三禮拜轉去看伊一擺，阮阿母講：看一擺趁一擺。招伊來阮兜蹛幾天a7，伊攏勿愛。平常時阮阿母就用電話佮伊開講。人講：「在生一粒豆，較贏死後拜豬頭」，我是猶未當體會，毋過看阮阿母按呢走磫，予我感覺我足幸福e7，逐工攏會當看著阿爸阿母，所以我要好好把握即個時陣，有時間就要陪伴阿爸阿母。毋通像江蕙唱的落雨聲講：毋通等成功欲接阿母蹛，阿母啊已經無佇遐。
擱來第二要把握的代誌，就是感恩佮做好代，咱若有受人幫助，雖然無法度馬上報答人的恩情，至少嘛愛表達內心的感謝，將來有能力的時，要會記哩「食人一口，還人一斗」。有能力會當幫助人，就要盡力幫忙，而且毋通想欲要人報答，按呢才是真正做好代，若較濟人逗陣做好代，按呢社會才會和諧、幸福、快樂，因為助人為快樂之本。
第三要把握的代誌，就是把握青春認真讀冊，人生只干若活一遍，錯過青春，人生就烏有。我即馬猶是一個學生，只有認真讀冊，充實家己，予家己有“二步七仔”，將來毋才有才調照顧序大人，嘛才有才調幫助別人。我定定和阮阿姐滾耍笑，講我以後要予伊飼，想想咧，我猶是「家己種一叢，較贏看別人」。
第四要把握的代誌，就是出現佇咱身軀邊的機會，要好好仔把握，勇敢去面對，安呢才有機會開創咱美好的未來，像即擺我欲參加台語演講比賽，我本來是真秘伺的人，徛佇台頂攏會手腳肉皮皮挫，毋過老師鼓勵我，講驚驚未得等，試看覓咧！阿母講若欲參加，就要認真準備，毋通頭興興，尾冷冷。經過這擺比賽，予我膽頭變較在，拄著代誌，未擱畏事毋敢講出來。所以好好把握機會，嘛是真要緊的代誌。
第五要把握的代誌，就是身體要健康，有人七少年八少年，身體就哩哩落落，泰山的體格，像阿婆仔的身體。咱活在世間，無論你儉偌濟錢，你的寄金簿仔，有幾個零，身體若無健康，人生嘛是化為烏有。咱欲賺錢、打拼，尚大的本錢，就是要有健康的身體。所以我要趁我猶少年的時陣，佮我的身體，鍛鍊乎較健康咧，以後若要做甚麼粗重的工作，也才有本錢，這就是我第五項要把握的代誌。因為我感覺一個人若無健康的身體，欲完成都才我講彼的要把握的代誌，遐就阿婆仔生囝，成拼咧。
我實在足幸福e7，會當專心讀冊，無像有的囡仔，歇睏日，擱要佮in爸母逗做生意。阿母講：恁姊妹仔，機會攏共款，將來好bai2攏看恁家己有認真boo3。
我看我要好好把握時間認真讀冊，若無「少年未曉想，食老就毋成樣」。
留言列表
