高中生活的艱苦佮快樂
國中三年拼命衝，想欲考牢好的高中，成績無好牢南中，
心內本來真失望。入去南中讀一年，環境優美無塊比，
交通便利復舒適，乎我漸漸愛著伊‧為著學校的名譽，
校長先生勤教示，希望學生會成物，總有一天出頭天。
學校一日到晚佇考試，透早考到黃昏時，數學國文和英語，
公民歷史擱地理，猶有化學佮物理，禮拜擱要寫週記，
逐日讀佮三更半暝，考佮予我夯白旗，有時想欲ga7放棄，
又擱驚講考紅字，轉去阿母若問起，毋知按怎回答伊，
恐驚耳孔會塞未離，順紲澎湖菜瓜予我吃到畏。
月考若到擱較嚴重，大家認真拼命衝，放學轉來守房中，
手寫嘴背目周相，希望成績會出眾。一隻白目的蠓仔脯，
佇咧耳仔邊嗡嗡嗡，伊笑我平時毋用功，考試若到才抓狂‧
乎我氣一下半小死，趕緊起來尋傢俬，準備佮伊拼生死，
後來想講勿愛插伊，佮伊生氣無意義，還是較早來去睏，
明仔載頭腦才會清醒，考試才會較順利。
阮班查某囝仔水噹噹，未輸天頂的仙女，有時赤佮u3鼎邊，
有時加若像淑女；查甫攏是緣投仔桑，講話笑詼擱趣味，
逐工逗陣佇讀冊，感情親像姊妹兄弟，這款珍貴的友誼，
我會永遠珍惜伊。
下課鐘聲一響起，教室裡面若菜市，有人強欲走未離，
一下衝到便所去，有人佇咧戲手機，邊仔一桌佇行棋，
查某囝仔佇咧討論偶像劇‧大家講佮要趣味，若講若笑毋知時‧
上課鐘聲來彈起，大家抑擱一直啼，等到先生入教室，
同學才攏恬恬去，先生認真佇講課，阮嘛專心聽教示。
學校運動會的時，先生學生攏真歡喜，鼓聲鑼聲響連天，
比賽已經欲開始，人講輸人毋輸陣，輸陣就會歹看面‧
選手逐個攏真gau5，槍聲若響拼命走；有人走佮車糞斗，
坐佇土腳佇懊惱；有的走佮一個面紅記記，頂氣接未著後氣，
最後阮班著第二，全班嘛攏足歡喜。
學校社團真多元，看你甲意叨一款，大部分攏會照心願，
放鬆壓力心身歡；我是參加熱舞社，跳煞無輸去爬山，
跳佮汗流復散滴，身軀的衫褲無一位乾。
高中實在無快活，課業足重壓力大，若無認真緊打拼，
聯考驚會跋落馬腳，為著前途來設想，毋驚艱苦向前行，
大學放榜彼一天，快樂收成笑哈哈，笑哈哈。
留言列表
