每一個人心目中攏有伊崇拜的英雄，像警察維護治安是英雄，醫生救人是英雄，消防人員打火是英雄，運動選手出國比賽提著金牌轉來，嘛是英雄，甚至毛澤東佇in的百姓心目中，也是一個大英雄。當然，每一個英雄攏有值得咱尊敬佮崇拜的所在，毋過我心目中的英雄是阮阿爸。
會記哩我讀幼稚園的時，有一擺禮拜日，阿爸tshua7阮歸傢伙仔去溪仔邊戲水，我倚無好勢滑倒，差一點仔就去予水流去，好佳哉阿爸倚佇邊仔，趕緊佮我giu2起來，自迄時陣開始，阿爸就是我心目中的英雄。
阮阿爸毋是什麼大官虎，嘛毋是董事長，抑是總經理，伊只是一個平凡的吃頭路人。阿爸每工準時上下班，透早騎機車載我去學校了後，才去公司上班。佇半路，伊會教我一寡做人的道理，我尚愛佇這段時間和阿爸開講。下班了後，一定準時轉來食晚頓，暗時教我做功課，學校的工藝作業交代予伊，絕對萬事OK。
茨內的電火、水道、馬桶、熱水爐，若有故障，經過阿爸處理了後，一定妙手回春。阿爸佇阮兜，毋若是搖錢樹，更加是萬能的博士博。
歇睏日出去tshit-tho5騎鐵馬，因為我be7曉騎，阿爸就租一台兩人座的鐵馬載我，可能是我大漢啊相重，我看阿爸有淡薄仔喘，所以轉來了後，我叫阿爸教我騎，阿爸佇鐵馬後面扶咧
，叫我坐予正，鐵馬手huann7予在，我想講有阿爸作靠山穩妥當，所以就放心用力共踏落去，哇！我會曉騎鐵馬啊呢。毋過轉彎的時，無小心煞來跋倒，我驚一下，毋敢閣騎，阿爸講：「學鐵馬，無跋倒哪學會曉，驚驚be7得等，來, 閣一遍。」經過阿爸一直鼓勵，最後我真正會曉騎囉，以後阿爸就毋免遐辛苦要載我啊。
阮阿爸嘛毋是攏遐好性地，我若顧看電視，抑是耍電腦，無佇用功，亦是會乎伊修理，伊講一個人的命運，三分天注定，七分靠打拼，愛拼才會贏。若無趁少年認真讀冊，少年未曉想，食老就會毋成樣。
古早人講：父母疼子長流水。阿爸遐呢疼我、惜我，我要認真讀冊，才be7辜負伊對我的期望。
留言列表
